O conselleiro de Cultura, Educación e Ordenación Universitaria, Román Rodríguez, mantivo hoxe unha xuntanza de traballo coa comunidade educativa do CEIP Mestre Valverde Maio de Mos, en Sanguiñeda, co fin de abordar as necesidades escolares do centro. O conselleiro estivo acompañado pola Alcaldesa de Mos, Nidia Arévalo, o concelleiro de Patrimonio e delegado de Educación, Camilo Augusto, e outros membros do equipo de goberno local.

Posteriormente, e a preguntas dos xornalistas, o titular do departamento educativo da Xunta de Galicia explicou que neste colexio levarase a cabo unha das actuacións previstas dentro da partida asociada ao Fondo de Superávit de Responsabilidade, detallado este martes no Parlamento galego.  

Investimento de 360.000 euros
Neste sentido, Román Rodríguez subliñou ante os medios presentes que a Xefatura Territorial de Pontevedra destinará 360.000 euros para construír un novo volume de aproximadamente 240 metros cadrados, que albergará un comedor e sala de usos múltiples, unha aula e dúas máis pequenas orientadas a desdobres. A actuación, por tanto, busca atender as necesidades de escolarización da zona e as demandas do servizo de comedor escolar.  

A dita obra permitirá gañar espazo no centro, co fin de dar resposta ás necesidades de escolarización da zona e ás demandas do servizo de comedor

En palabras do conselleiro, “estamos falando dunha obra que permitirá dar resposta ás altas demandas educativas do centro, desconxestionar os seus espazos e mellorar, en consecuencia, o benestar do alumnado e do profesorado”.

IES de Mos
Por outro lado, en resposta ás preguntas dos xornalistas, o conselleiro trasladou que o seu departamento tamén actuará no IES de Mos grazas aos recursos conseguidos a través do dito Fondo de Superávit de Responsabilidade. Neste caso, acometerase o peche perimetral e a reparación da cuberta e dos aleiros do centro, cun orzamento de 100.000 euros.