O Pregoeiro das Festas da Rosa 2016, o porteiro do Real Club Celta de Vigo, Rubén Blanco, visitou esta tarde acompañado polo seu avó o Campo de Fútbol do Santiaguiño, na súa parroquia natal –Guizán-, onde deu os seus primeiros pasos futbolísticos. Nesta visita tan especial estiveron presentes tamén a alcaldesa de Mos, Nidia Arévalo, a concelleira de Cultura mosense, Sara Cebreiro, e o edil de Deportes, Alberto Méndez; xunto cos artistas Andrea Pousa e o Bruxo Queiman, que farán de Mestres de Cerimonias de Rubén Blanco o vindeiro luns 13 de xuño, Día da Rosa e festivo local en Mos, ás 12.00 horas da mañá na Praza do Concello, cando Blanco dará o seu Pregón.

Os artistas galegos, embaixadores da Cultura Atlántica, o actor Bruxo Queiman e a cantante Andrea Pousa serán os encargados o luns de presentar e darlle paso ó Pregoeiro da Festa da Rosa en Mos, cun espectáculo personalizado, onde a declamación conmovedora de Bruxo Queiman e a voz sensitiva de Andrea Pousa deixaranse ver e soar na Praza do Concello de Mos.

Bruxo Queiman e Andrea Pousa garantiron durante o encontro desta tarde que será un acto moi emotivo, onde a protagonista será a Rosa de Mos e a exaltación da figura do xogador mosense, Rubén Blanco.

Os dous artistas acudiron esta tarde a Mos vestidos de Encaixe de Camariñas, facéndolle un guiño á IX Xuntanza de Palilleiras de Mos que se celebrará o vindeiro sábado 18 de xuño en Costoias, Tameiga, tamén con motivo das Festas da Rosa. Andrea Pousa estaba hoxe vestida de José Matteos cun deseño inspirado na Rosa e con complementos de Encaixe de Camariñas e o Bruxo Queiman, tamén viu vestido con complementos de Encaixe de Camariñas, realizados por José Matteos.