O Concello ven de engadir un novo ordenador de consulta na Biblioteca Municipal de Nigrán e de reacondicionar os dous existentes, con elo, gáñase un posto máis dende onde o usuario pode conectarse á rede e optimizase o seu funcionamento. Por outra banda, a biblioteca conta dende maio cun novo traballador, trátase dun diplomado en Biblioteconomía e Documentación que grazas á financiación da Deputación desenvolverá ao longo deste ano a súa labor na biblioteca. Esta é unha aposta máis do goberno por este espazo, no que dende outubro modificou o horario de 9.00 a 21.00 horas de luns a venres, deixando polo tanto de pechar a mediodía, tal e como viñan reclamando os usuarios. Paralelamente, o Concello prevé dispor durante este ano dun proxecto técnico de Biblioteca Municipal  deseñado dende a Escola Superior de Vilanova de Cerveira (Portugal) para dar cobertura ás necesidades reais dos seus veciños. “Temos que reforzar e mellorar ao máximo este servizo clave que, sabemos, actualmente se queda corto”, indica Juan González, alcalde de Nigrán.