A nova directiva da Asociación de Empresarios de Mos, AEMOS, encabezada polo seu presidente, Manuel Castro, reuniuse onte no Concello coa alcaldesa mosense, Nidia Arévalo, para trasladarlle a súa solicitude de apoio e colaboración institucionais para diferentes proxectos da asociación. Ditas iniciativas, ante as que a rexedora local amosouse receptiva e interesada de cara a futuras colaboracións, van dirixidas ó desenvolvemento empresarial e á mellora da competitividade das empresas asentadas no termo municipal.

Os empresarios buscan, neste sentido, axuda das diferentes administracións para impulsar o Polígono Empresarial PEMOS Veigadaña, a mellora de instalación e servizos nas zonas industriais de Mos, o acceso á Banda Ancha (Fibra Óptica de Alta Velocidade) no municipio e a xestión do emprego.

Os obxectivos de AEMOS respecto do Polígono de Veigadaña son:

Impulsar o Proxecto Agrupado de Naves Modulares baixo o Dereito de Superficie intentando dar solución ás necesidades de solo das micropymes do municipio.

Construir o Centro de Negocios e Servizos, un edificio de usos múltiples como centro vertebrador do tecido empresarial do municipio e plataforma Business Center.

Realizar os accesos á área industrial O Cebral-PEMOS coa Autovía A-55 (Vigo-Porriño). Mellorar os servizos de recollida de lixo, alumeado e pintado de viais nas áreas industriais. Acondicionar zonas verdes de esparcemento e axardinamento do Parque Empresarial. Establecer maior contro do tráfico, estacionamentos e vixilancia.

No que respecta ó emprego a Asociación de Empresarios de Mos busca unha coordinación e colaboración estreita entre axencias e programas cuxo obxectivo se oriente ó incremento da inserción laboral, con especial atención a colectivos de difícil inserción.

Para todo elo “empresarios mosenses e Concello traballarán da man en aras de mellorar a economía municipal”, tal e como esta mañá declaraban o presidente de AEMOS e a alcaldesa, Castro e Arévalo, respectivamente.