A conselleira de Infraestruturas e Vivenda, Ethel Vázquez, mantivo o pasado xoves día 9 unha xuntanza de traballo co alcalde de Salvaterra de Miño, Arturo Grandal, ao que lle trasladou que o Goberno galego iniciará no verán as obras de mellora do firme e reposición de servizos na rúa Rosalía de Castro. Vázquez Mourelle sinalou que a Xunta licitou estas obras no pasado mes de abril por un importe de máis de 300.000 euros.

O treito a mellorar, ten unha lonxitude de 600 metros. Reporase o firme da calzada, dende a glorieta existente coa rúa do Miño ata o final do treito urbanizado, incluíndose tamén accións de instalación de novas redes de saneamento e pluviais.

Tamén se falou da senda peonil que se está levando a cabo na estrada PO-402 que vai dende o cruce de Oleiros ata a igresa, cuxo investimento é de preto de 60.000 euros.

Esta senda de medio quilómetro de lonxitude, pola marxe dereita da estrada, comunicará o núcleo de Oleiros co cemiterio.