Ante a protesta dun colectivo de comerciantes dos arredores da Praza Maior n no Concello, a Concelleira de Seguridade Cidadá e Mobilidade, Vanesa Fernández, afirma que "nas últimas semanas mantivemos varias reunións cos veciños e cos comerciantes das rúas que se van a peonalizar, reunións nas que se recolleron algunhas demandas súas co fin de mellorar todo o posible este espazo común da nosa vila. Así por exemplo, unha das demandas que se fixo trataba sobre a necesidade de acceder por parte de persoas con mobilidade reducida e persoas que tivesen que cargar algún vulto pesado. Neste sentido contemplouse unha zona de servizos que permitirá a dar solución a esta demanda veciñal".

Na última reunión mantida no Centro Social, a Concelleira de Seguridade Cidadá e Mobilidade "manifestou que actualmente temos na Praza Maior un problema de seguridade dos nosos nenos e maiores, ao que urxe darlle unha pronta resposta". De feito fai algo menos dun mes un menor case resulta atropelado por un turismo que circulaba por unha zona prohibida, xa hoxe en día, na Praza Maior. Son numerosos os veciños e veciñas que acoden a Praza Maior e manifestan verbalmente o seu descontento e preocupación co continuo tránsito de vehículos por esta Praza repreta de xente.

“É responsabilidade dos gobernantes pensar e actuar en favor do ben común, protexendo aos máis vulnerables”, afirma Vanesa Fernández, concelleira de Seguridade Cidadá e Mobilidade.

Os obxectivos da peonalización son diversos: crear un espazo propicio para o comercio, diminuír a contaminación, revitalizar un espazo público, recuperar os peóns como elemento clave da identidade urbana, en definitiva devolverlle a cidade á veciñanza. “Gañaremos en calidade de vida, seremos un punto de atracción xa que a peonalización chama á xente e a xente chama ao negocio, gañaremos dinamismo comercial e gañaremos en seguridade”, afirma Vanesa Fernández.