O delegado territorial da Xunta en Vigo, Ignacio López-Chaves, recibiu esta semana no edificio da delegación ao novo presidente do Real Club Náutico de Vigo, Justo José González Ballesta.

González Ballesta converteuse o pasado 24 de xuño no novo presidente do Real Club Náutico de Vigo, relevando á anterior presidenta, Viviana García. Tratouse dun primeiro encontro institucional de presentación e unha reunión para afianzar as relacións e tratar as posibles colaboracións entre a Xunta e o Náutico.

Durante a reunión falouse de asuntos de actualidade relacionados coa actividade náutica, cultural, social e deportiva e o delegado amosou o apoio da Xunta de Galicia á histórica organización da cidade que acaba de cumprir 110 anos.