A Deputación de Pontevedra vén de aprobar na súa Xunta de Goberno dúas achegas económicas para o concello de Cotobade dentro do Plan Concellos 2016, cun importe total de 264.216,43 €. Ambas contías se inclúen na liña 1 de investimentos deste plan provincial. Unha achega, de 154.026,51 €, destinarase para a mellora da seguridade viaria no acceso a Aldea de Arriba - Santa María de Sacos. Outro investimento, de 110.189,92, irá para o acondicionamento e pavimentación da pista municipal en Fentáns.

Estas dúas novas axudas veñen sumarse ás xa concedidas anteriormente ao abeiro do Plan Concellos 2016 para o concello de Cotobade. Trátase das primeiras contías concedidas ao abeiro da liña 1, mentres que na liña 3 -actividades culturais, deportivas, sociais, turísticas e medioambientais-, o Plan Concellos achegou un total de 19.224,13 € para diversas viaxes, a Transgalaica, o Día do Neno, o Entroido, o Petote, os obradoiros de memoria e psicomotricidade e a X Feira de Cuspedriños.

Por último, na liña 4 destinada ao emprego, 112.707,38 € foron destinados á contratación de 13 traballadoras e traballadores que desenvolven os seus traballos en servizos municipais.

No que levamos de ano, o Plan Concellos leva executado o 77,2% do total destinado a Cotobade, o que supón polo momento uns investimentos no municipio de 396.147,94 €.