A alcaldesa de Mos, Nidia Arévalo, e a concelleira de Urbanismo e Medio Ambiente, Julia Loureiro, informaron onte da inminente sinatura, que se levará a cabo nos vindeiros días, dun convenio de colaboración entre o Concello de Mos, a Entidade de Conservación do Parque Empresarial da Veigadaña PEMOS, e ACEESCA Emprego (que xa se encarga do mantemento das zonas axardinadas municipais) para o mantemento e embelecemento das glorietas axardinadas do polígono.

As representantes municipais, Arévalo e Loureiro, destacaron a “importancia deste convenio, que implica un grandísimo labor social de integración laboral das persoas que padecen algún tipo de discapacidade ó tempo que se embelecen as rotondas deste Polígono da Veigadaña, no que xa hai un elevado número de empresas instaladas e esperamos que se asenten nel moitas máis; por iso queremos conseguir que teña a súa mellor cara” declararon.

Nas glorietas dos dous accesos principais ó Parque Empresarial (xunto ó Campo de Fútbol das Baloutas e xunto á estrada Nacional 550) instalarase rego automático e adecentarase o resto. Todas serán embelecidas con traballos de xardinería mediante os que se prantarán flores e prantas adecuadas, entre elas rosais, ó ser a rosa o símbolo do Concello de Mos e o emblema do seu escudo heráldico.

Aínda que o convenio se asinará xa próximamente, as melloras realizaranse a partir do mes de setembro, que é a época máis axeitada para a prantación.

Deste xeito, ademais contribuír á labor social da inserción laboral de persoas con discapacidade, Concello e PEMOS aúnan esforzos para manter o Parque Empresarial de Veigadaña nas mellores condicións. Pola súa banda, o Concello de Mos destinará unha brigada municipal de desbroce á limpeza de maleza en taludes e zonas comúns para previr o risco de incendios.

A Xunta Directiva da Entidade de Conservación do Parque Empresarial da Veigadaña, PEMOS, está integrada por Fernando García Fontán da empresa Melytour (presidente), Lucía Rodríguez González (vicepresidenta), José Manuel Magariños Montes da empresa Tecdisma (tesoureiro e secretario), Manuel Castro Álvarez da empresa Mecoxi (vogal e actual presidente de AEMOS, Asociación de Empresarios de Mos) e Alfredo Fandiño da empresa Fredi Fandiño (vogal).