Os gañadores mosenses deste concurso de debuxo posto en marcha polo Consorcio de Augas do Louro foron Daniel Martínez Castro de 9 anos de idade e alumno de 4º curso de Educación Primaria do CEIP de Petelos (primeiro clasificado), Elena Gamallo Cea de 10 anos de idade e alumna de 4º curso de Educación Primaria do CEIP de Petelos (finalista) e Mara Lorenzo González de 9 anos de idade e alumna de 3º curso de Educación Primaria do CEIP Atín-Cela (finalista).

Nesta iniciativa participaron todos os centros educativos do Concello de Mos, os cinco colexios públicos: CEIP de Petelos, CEIP Pena de Francia, CEIP Atín, CEIP Mestre Martínez Alonso de Castro-Mos e Mestre Valverde Maio de Sanguiñeda; e o Colexio Lar. Todos aceptaron participar moi gustosamente por considerala unha iniciativa moi enriquecedora, instructiva, didáctica, educativa; así coma creativa e divertida para os alumnos e alumnas que cursan Educación Primaria.

Os estudiantes podían realizar as súas creación artísticas sobre calquera das fases do ciclo da auga e/ou do proceso de depuración e as obras foron sometidas a votación popular a través de Facebook.

O concurso ía dirixido a todos aqueles nenos e nenas que se atoparan cursando 3º e 4º cursos de Primaria, ademais de no Concello de Mos tamén nos outros tres municipios integrantes do Consorcio de Augas do Louro: O Porriño, Tui e Salceda de Caselas. Os nenos e nenas tiñan que amosar nos seus debuxos como a auga chega dende a natureza ata as súas casas utilizando os diferentes elementos que forman o ciclo integral da auga. Para iso, os debuxos debíanse presentar no papel oficial que o Consorcio do Louro subministraba para este concurso.

Os participantes que quixeran ver unha referencia gráfica de como é o ciclo da auga podían facelo na páxina web do Consorcio de Augas do Louro.

Entre todos os debuxos participantes realizouse una preselección de 6 debuxos por Concello. Estes debuxos estiveron dispoñibles no enlace de Facebook habilitado dende a páxina web www.consorciodolouro.es para que os usuarios puideran votar e elixir ao gañador e aos dous finalistas de cada Concello dende o 30 de maio.

O premio para os catro gañadores (un por cada Concello) foi unha tableta Samsung 7’’ e o premio para os oito finalistas (dous por cada Concello) foi unha cámara dixital acuática.