O Concello de Mos e a Fundación Pazo de Mos organizaron este pasado sábado conxuntamente un acto na honra da poeta mosense María Magdalena.

Tratábase dun evento no que participaron a Banda de Gaitas Santa Eulalia de Mos e o Grupo de Acordeóns Argonat Band. A homenaxe oincidía co aniversario da poetisa do Val da Louriña que hoxe luns 11 de xullo cumpre 94 anos.

Tanto a alcaldesa de Mos, Nidia Arévalo, coma a concelleira de Cultura mosense, Sara Cebreiro, aseguraban que con este xesto “prémiase a traxectoria literaria de María Magdalena, considerada unha das tres mellores poetas galegas sen estudios”.

 A este respecto as representantes municipais, Arévalo e Cebreiro, insistiron en que “como gran artista do Concello de Mos que é, merece máis que sobradamente este recoñecemento público. É unha muller digna de admiración, porque ademais do seu labor literario, é unha muller forte, traballadora e loitadora, que sacou adiante á súa familia. Ademais, destaca pola súa vinculación ó mundo asociativo e cultural deste noso municipio”.

 Así mesmo quixeron agradecerlle a María Magdalena “o traballo de toda unha vida por, sobre e para Mos”. E recalcaron que é “unha das figuras femininas máis importantes e relevantes deste Concello”.

Durante a súa traxectoria literaria, María Magdalenda desenvolveu unha prolífica carreira como escritora. Destaca pola sensibilidade das súas intimistas composicións poéticas, e pola viveza e espontaneidade dos seus textos que os fai tan atractivos para todo tipo de lectores.

Unha homenaxe na que  María Magdalena recibirá na súa parroquia, a de Mos, a gratitude de todo o municipio polo seu labor de toda unha vida.