Este venres foron oficialmente recibidos no Concello de Mos os seis nenos  e nenas saharauis, procedentes dende o Sáhara para pasar a tempada estival na localidade mosense, realidade que será posible gracias ó programa Vacacións en Paz da Asociación Solidariedade Galega co Pobo Saharaui.

Seis familias veciñas do municipio mosense acollen a estes cativos no seu seo para que pasen os meses de verán xunto con elas.

Ademais dos 6 pequenos protagonistas e as súas familias de acollida, estiveron presentes no recibimento celebrado no Concello a alcaldesa de Mos, Nidia Arévalo, e a concelleira delegada de Política Social mosense, Julia Loureiro.

O Concello de Mos pon a disposición das familias acolledoras mosenses de xeito totalmente gratuíto a participación dos cativos no campamento estival Mañás de Verán, para que os pais de acollida poidan conciliar fácilmente as súas vidas familiar e laboral. 2 dos 6 pequenos saharauis que pasarán o verán en Mos xa están inscritos neste campamento estival.

Ademais o Concello organizará para os cativos saharauis unha xornada de convivencia na Piscina Municipal ó aire libre de San Eleuterio entre outras actividades. Esta xornada será unha concentración de tódolos nenos saharauis do programa Vacacións en Paz e as súas familias de acollida durante o que representará un emotivo día de convivencia.

Asistencia médica

Un dos principais obxectivos do programa Vacacións en Paz é a asistencia médica dos nenos e nenas saharauis que veñen en acollida durante o verán.

Existe un convenio co Sergas polo cal os cativos saharauis recén chegados poden beneficiarse de todo tipo de revisións médicas e se lles poñen as vacinas necesarias e correspondentes ás súas respectivas idades. Facilitar a atención sanitaria a estes nenos e nenas que non poden acceder á mesma no seu país de orixe é, sen dúbida, unha das finalidades máis importantes desta iniciativa solidaria.

Sobre este programa a edil mosense, Julia Loureiro, declarou que “é unha verdadeira sorte poder contar no municipio de Mos con familias que deciden involucrarse nunha causa solidaria coma esta, que trae sorrisos a nenos e nenas que verdadeiramente o necesitan”.