A presidenta da Deputación de Pontevedra, Carmela Silva, mantivo unha reunión de traballo coa asociación de Empresarias de Galicia, coa fin de establecer liñas de colaboración para "visibilizar a situación da muller no ámbito profesional da empresa", tal e como subliñou a Presidenta provincial.

Silva destacou o importante papel da asociación "para poñer en valor o papel das mulleres no campo empresarial, do emprendemento, das pemes, co fin de que a sociedade tome conciencia de cantas mulleres están a impulsar proxectos que xeran actividade económica e emprego".Neste eido, a presidenta da Deputación manifestou que "no noso país a porcentaxe maioritaria de persoas emprendedoras correspóndese con mulleres".

A asociación de Empresarias de Galicia ten por finalidade converterse na canle de participación para o deseño de políticas de prevención e tratamento integral da violencia de xénero e discriminación, así como impulsar redes de apoio que permitan que as mulleres continúen medrando persoal e profesionalmente.

Dado que a asociación naceu no ano 2016, a presidenta da Deputación adiantou que o vindeiro ano Empresarias de Galicia poderá optar ás axudas que desde a área de Igualdade da institución provincial se están a impulsar, "porque queremos que a Deputación de Pontevedra se converta nunha institución referente ó lado das mulleres, visibilizando o seu papel na sociedade".