A Xunta de Galicia vén de publicar no Diario Oficial de Galicia (http://bit.ly/2ayJ2C0) o Plan de Residuos Industriais de Galicia (2016-2022), co que se inicia a segunda e definitiva exposición publica antes da súa aprobación, tal e como establece a Lei 21/2013, de 9 de decembro, de avaliación ambiental.

Os interesados poderán facer alegacións ao Plan e o Estudo Ambiental Estratéxico, colgados tamén no portal web da Consellería de Medio Ambiente e Ordenación do Territorio (http://sirga.xunta.gal), ata o vindeiro 27 de setembro. A partir desa data, a Secretaria Xeral de Calidade e Avaliación Ambiental emitirá a Declaración Ambiental Estratéxica. Unha vez emitida, o Plan deberá elevarase ao Consello da Xunta para a súa aprobación. As previsións son que se poida aprobar este documento no outono do 2016, co que se culminará unha importante tarefa en materia de planificación e xestión de residuos e se dará cumprimento á Directiva marco de residuos.

 

O documento proposto incorpora unha análise específica sobre os efectos da xeración e xestión de residuos no cambio climático e no impacto sobre a xeración de emprego

 

Este plan constituirá o marco de referencia na planificación da xestión dos residuos industriais en Galicia, achegando conceptos, principios e estratexias a adoitar na correcta xestión de residuos industriais nos próximos anos. Neste sentido, a Administración galega invita á sociedade en xeral a participar na definición deste documento e sobre todo ao sector produtivo e aos xestores de residuos.

O documento do PRIGA 2016-2022, incorpora os seguintes principios reitores:

• Xerarquía de residuos.
• Autosuficiencia e proximidade.
• Principio de quen contamina paga.
• Responsabilidade ampliada do produtor do produto.
• Loita contra o cambio climático.
• Eficiencia no uso de recursos.
• Responsabilidade compartida.
• Facilitar o acceso á información.
• Entre os obxectivos estratéxicos pódese destacar:
• Implicar a todos produtores e consumidores na prevención de residuos.
• Mellorar a I+D+I no campo da prevención.
• Mellorar e automatizar as ferramentas de información administrativa.
• Recuperar a maior parte dos materiais contidos nos recursos.
• Minimizar ao máximo posible a eliminación de residuos.
• Reducir os efectos a nivel de cambio climático.
• Tender ao establecemento da economía circular.