Todo o bo chega á súa fin. Tras dúas semanas nas que os participantes do curso adornaron cos seus graffitis o muro da praia de Fedorento, este luns día concluíu o curso de graffiti organizado pola Deputación de Pontevedra en colaboración con Concello da Guarda, dentro do programa Depo RúARTE.
 

Ao acto de clausura que tivo lugar na propia praia de Fedorento acudiron as concelleiras de Turismo e Xuventude do Concello da Guarda, Montse Magallanes e Elena Baz, e tamén a deputada provincial de Xuventude, Digna Rosa Rivas, que xa presenciaran a inauguración do mesmo. Nesta última xornada do curso puideron comprobar o resultado final de todo o traballo realizado e as técnicas aprendidas. Ademais intercambiaron impresións cos participantes para saber que lles parecera a experiencia e lles fixeron entrega dun diploma.
 

As autoridades presentes tamén quixeron destacar a importancia de que a mocidade se implique na vida cultural da vila e aseguraron que dende a Deputación e o Concello seguirán a promover este tipo de actividades, e continuará ofrecendo posibilidades para plasmar a súa arte en forma de graffiti noutros recunchos da Guarda.
 

Dentro desta implicación por impulsar actividades entre a xuventude nas próximas semanas dará comezo un novo curso dentro de Depo RúARTE, nesta ocasión de temática funky. O curso empeza o 29 de agosto e todos os que o desexen poden inscribirse achegándose ao Rexistro do Concello da Guarda ata o día 19 de agosto en horario de 8 a 14 horas.