A curtametraxe “Montañas ardientes que vomitan fuego” realizada pola compostelana Helena Girón e o tinerfeño Samuel M. Delgado, terá a súa estrea mundial no Toronto International Film Festival (TIFF) e seguirá o seu percorrido no prestixioso New York Film Festival a principios de outubro.

Partindo das teorías do científico do S.XVII Athanasius Kircher, segundo as cales os volcáns estaban interconectados entre si creando unha rede de vasos comunicantes a través do interior da terra, a película xera unha viaxe temporal a través do tubo volcánico da Coroa, na illa de de Lanzarote. Nesa viaxe que crea unha experiencia inmersiva a través dun tubo volcánico, conviven elementos de distintos tempos e espazos vinculados á cultura soterrada de Canarias que resisten ante unha ameaza que se aproxima á illa.

O festival canadense, que acollerá a estrea mundial deste traballo, está considerado como o segundo festival máis importante do mundo despois do festival de Cannes. Trátase da segunda vez que os cineastas visitan este festival tras acudir o ano pasado co seu anterior traballo, “Sin Dios ni Santa María”, gañador do premio Galicia e o premio do público no Curtocircuíto Internacional Film Festival de Compostela.

A programación que acollerá esta primeira proxección, chamada Wavelenghts en honra ao cineasta canadense Michael Snow e comisariada por Andréa Picard, está considerada como a referencia dentro do cine de autor e experimental a nivel mundial.

Por outra banda, seguirá o seu percorrido no prestixioso New York Film Festival dentro da sección Projections, outra das máis importantes referencias a nivel internacional do cinema vangardista. Éste terá lugar a principios de outubro no Lincoln Center.

A cinta conta co deseño sonoro de Juan Carlos Blancas, composto integramente por gravacións realizadas na illa e está filmada con negativo caducado de 16mm revelado artesanalmente, unha técnica moi complexa e laboriosa que os cineastas xa empregaran no seu anterior traballo. Pero “Montañas ardientes que vomitan fuego” expón unha viaxe no tempo, un percorrido a través da cuarta dimensión, e por iso aposta pola mestura de formatos conxugando o uso do celuloide, coa imaxe dixital en 4K e as fotografías de arquivo que forman parte do Arquivo de Fotografía Histórica de Canarias FEDAC do Cabildo das Palmas.

Enlace ao tráiler: https://vimeo.com/177069644

Web: www.labandanegra.net