O Goberno local do Porriño colocará cámaras de vixianza no centro peonil da vila logo de que os sinais, nos que se indica que está prohibido o uso de patíns, balóns e bicicletas nesta parte da vila, aparecesen tapados con pintadas.

A alcaldesa lembrou que foi este goberno quen fixo cumprir unha ordenanza municipal, aprobada por outra Corporación, na que se establecía que na ‘peonil’ do Porriño non se podía circular a velocidade con bicicletas e patíns e tampouco xogar  á pelota.

Estas prohibicións, subliña Eva García de la Torre, “foron un clamor dos comerciantes e dos veciños” que reclamaban poder camiñar, mercar, sentarse na terraza dunha cafetería ou gozar con tranquilidade do tempo de lecer no centro do Porriño, “sen ter que temer o atropelo por parte dunha bicicleta ou que se rompese un escaparate dun balonazo”.

Nos vindeiros días o Concello reparará os sinais, ben facendo unha limpeza dos mesmos, se é posible, ben colocando unha placa de vinilo para que os mesmos  sexan visíbeis de novo.