A alcaldesa de Mos, Nidia Arévalo, a concelleira de Medio Ambiente, Julia Loureiro, e o edil de Vías e Obras, Luis Alonso, alertaron onte do deficiente estado no que se atopa a estrada Peinador-Os Valos, no que a limpeza viaria se refire.

“Dende que entrou o goberno da nova Deputación de Pontevedra, presidido por Carmela Silva, non se realizaron labores de limpeza viaria nas estradas provinciais ó seu paso polo Concello”. O que, segundo argumentan os representantes municipais mosenses, “resulta paradóxico, xa que o parque de maquinarias atópase infrautilizado”.

“O exemplo máis sangrante é o da estrada Peinador-Os Valos, cuxas beirarrúas se atopan completamente impracticables para os peóns ó estar invadidas pola maleza. E é que o único traballo que se dignou a facer a a Deputación foi adecentar a estrada Puxeiros-Mos pero porque ía pasar a Volta Ciclista a España por ela, ademais tan só desbrozaron o tramo polo que transcorría a Volta e unha semana antes da mesma”, declararon Arévalo, Loureio e Alonso.

A rexedora local mosense informa tamén de que dende fai meses se lle están dirixindo escritos semanais á administración provincial instando á limpeza viaria pola seguridade de viandantes e condutores, “ós que nos fan caso omiso demostrando a deixadez da actual Deputación, que nin sequera asume a limpeza viaria das estradas da súa titularidade, tendoas feitas un desastre a pesar de ter o parque de maquinaria infrautilizado, puidendo destinar máquinas do mesmo a realizar labores de desbroce nos camiños e estradas provinciais dos municipios”. “Pasotismo” da Deputación e a súa presidenta que Arévalo lamenta “profundamente”.

Por último a alcaldesa concluiu solicitando novamente á Deputación e a súa presidenta que se faga cargo polo menos das dúas estradas provinciais que atravesan o municipio de Mos e precisan de múltiples actuacións (Peinador-Os Valos e Puxeiros-Mos), sendo a necesidade máis imperiosa a limpeza viaria, por atoparse as cunetas nun deficiente estado e plagadas de maleza. Premura que podería ser subsanada cunha simple orde ó parque de maquinarias para que envíen efectivos a Mos. “Algo tan sinxelo que parece mentira que non se dignen a facelo”, concluiu Nidia Arévalo, quen asegurou que non deixará de defender na Deputación de Pontevedra os intereses dos máis de 15.000 veciños e veciñas de Mos e non parará ata que a administración provincial asuma as súas responsabilidades “entre as que se atopa manter en óptimas condicións os viais da súa titularidade”.