Un total de 48 persoas foron atendidas nos hospitais Álvaro Cunqueiro (HAC), Povisa e Clínica Fátima de Vigo tras o accidente dun tren de pasaxeiros, esta mañá, ao seu paso polo concello do Porriño.

Segundo explicou hoxe o conselleiro de Sanidade, Jesús Vázquez Almuiña, deles 11 foron dados de alta; 27 continúan en Urxencias; e 9 foron ingresados (2 no Hospital Álvaro Cunqueiro, 5 en Fátima e 2 en Povisa) sen que se tema pola súa vida.

O conselleiro tamén informou de que, dos pacientes trasladados polos servizos sanitarios, faleceu no HAC un home de 23 anos, procedente de Vigo e que xa foi identificado pola súa familia, que non puido ser reanimado pese aos esforzos do persoal sanitario. No que atinxe á orixe dos pacientes atendidos, explicou que principalmente son españois e portugueses, pero tamén hai estadounidenses, alemáns e persoas de distintos países latinoamericanos.

Vázquez Almuiña destacou que a atención prestada polos profesionais sanitarios foi áxil e rápida. Neste sentido, agradeceu o traballo dos profesionais dos centros sanitarios implicados, dos que destacou a súa colaboración total e absoluta, sinalando que houbo persoas que se quedaron tras finalizar as súas quendas e persoas que, sen que ter que traballar hoxe, contactaron co seu centro laboral para ofrecer a súa axuda e dispoñibilidade. Tamén fixo un recoñecemento público ao persoal da Fundación Urxencias Sanitarias de Galicia-061, encargados de desprazarse ao lugar do accidente esta mañá para realizar a triaxe e coordinar as derivacións dos pacientes.

Doazón de sangue

Doutra banda, dende a Axencia Galega de Doazón de Órganos e Sangue (ADOS) salientan que actualmente as reservas de sangue en Galicia son boas e permiten dar unha resposta axeitada ás urxencias xurdidas.

Aquelas persoas que desexen colaborar coa Axencia nos próximos días poden informarse sobre os lugares

de doazón na web https://ados.sergas.es. Dende o Sergas faise así mesmo un recoñecemento a todas aquelas persoas que ao longo do verán acudiron a doar, xa que a súa colaboración xenerosa permite dar hoxe esta mensaxe.