A Presidenta da Deputación de Pontevedra, acompañada do alcalde de Vigo e varios deputados do goberno provincial, participou esta mañá na concentración na Estación de Guixar, que foi a estacion de saída do “Tren Celta” que onte descarrilou no Porriño causando a morte de catro persoas e varias decenas de feridos, e visitou despois ás familias das vítimas no tanatorio vigués.

Respecto dos labores no lugar do sinistro, Carmela Silva confirmou que os efectivos do Consorcio Provincial de Salvamento e Contraincendios estiveron a traballar toda a noite e conseguiron sacar o vagón máis danado sobre as seis da mañá, finalizando  así  o operativo despregado nas vías da Estación do Porriño.  Foi de madrugada, tras conseguir acceder  á zona de asentos do tren máis próxima á cabina, cando afortunadamente puideron confirmar que non había ningún corpo máis non seu interior.

Foron os efectivos do Parque de O Porriño, do primeiro e segundo turno, os que se fixeron cargo, aos poucos minutos do accidente, das tarefas de excarceración dos pasaxeiros atrapados e a evacuación dos feridos, utilizando kits de estabilización para apontoar o vagón.  Os traballos desenvolvéronse en “perfecta colaboración co operativo do Parque de Vigo e a policía local de O Porriño, así como co resto de medios de salvamento que se sumaron de inmediato aos labores de evacuación”, segundo explicou a Presidenta da Deputación de Pontevedra.

Silva quixo recoñecer o esforzo dos efectivos e do seu Xerente, Roberto Jorge Correa,  “que coordinaron perfectamente desde o primeiro momento a cobertura en toda a provincia, co Parque de Vilagarcía que se encargou do seguimento na área sur de Pontevedra, mentres que o de Ribadumia realizou esas mesmos  labores  no norte”, sinalou. De feito, a Presidenta visitará o luns o Parque do Porriño para agradecer persoalmente o traballo dos seus integrantes.

A Presidenta provincial, que cancelou a súa axenda pública ata o próximo luns, volveu a trasladar unha mensaxe de apoio e solidariedade ás familias das catro vítimas mortais no accidente, e de agarimo e desexo de recuperación aos feridos. A Deputación de Pontevedra decretou tres días de loito oficial e desde o venres a primeira hora as bandeiras do Pazo Provincial ondean a media hasta.