70 fotografías, pertencentes ao Fondo de Imaxe Municipal, e tomadas nos últimos cen anos, son o tema central da exposición que se inaugura este xoves, día 15, ás 8 da tarde, no Centro Cultural Municipal, baixo o título ‘As Festas do Cristo do Porriño’,e que son unha das partes centrais do programa das Festas do Cristo deste 2016.

Precisamente, esta festividade, as máis importantes do ano para os veciños, son o núcleo desta exposición que bota unha ollada á celebración do Cristo, con imaxes de 1913, 1915, das décadas do 20, 40, 50, e seguintes do século pasado.

Acompañadas con textos explicativos, a exposición, que estará aberta ata o 7 de outubro, amosa a evolución da Festa do Cristo, das procesións, co seu ‘carro triunfante’, no que se trasladaba a imaxe, dos costumes, o xeito de vestir, dos músicos, os xigantes, os cabezudos, os cativos e toda a escenografía ao redor dunha tradición que chega coa mesma forza e o mesmo interese ata os nosos días.