O Diario Oficial de Galicia (DOG) licitaba esta semana o contrato de execución e implantación de novos plans de emerxencia (http://bit.ly/2cmVdU9) para as presas da demarcación Galicia-Costa das que é titular a Xunta de Galicia: Caldas de Reis, Eiras, Baiona e O Con. O contrato ten un orzamento global próximo ao millón de euros.

Nunha primeira fase, os traballos consistirán na redacción dos catro proxectos de implantación nos que se definirán a forma de levar a cabo as distintas actuacións propostas nos plans xa redactados, desenvolvéndoas a nivel construtivo. Posteriormente, nunha segunda fase, abordarase a execución das obras e actuacións necesarias para a implantación efectiva dos plans de emerxencia destas presas.

A implantación destes plans, específicos para cada presa, conseguirá unha mellor coordinación entres as diferentes administracións que estarían involucradas nun hipotético caso de rotura ou mal funcionamento da presa e aumentar a formación da poboación que podería verse afectada no caso dunha emerxencia.