O vicepresidente da Xunta, Alfonso Rueda, amosou hoxe aos medios de comunicación o centro de prensa dende onde mañá se difundirán os resultados das Eleccións Autonómicas, nas que están chamados a votar 2.255.579 galegos, nas 3.977 mesas distribuídas polos 2.463 colexios electorais.

Rueda estivo acompañado do secretario xeral da Presidencia, Manuel Galdo, e da directora xeral de Relacións Institucionais e Parlamentarias, Blanca García Señoráns, cos que trasladou aos medios os detalles do desenvolvemento da xornada electoral e do dispositivo tecnolóxico e operativo que a Xunta puxo en marcha no Centro de Difusión de Datos.

Entre outros aspectos, explicaron que o censo electoral nestas eleccións ao Parlamento galego se eleva a 2.701.848 persoas, xa que aos máis de 2,2 millóns de electores censados en Galicia hai que sumarlle os 446.269 inscritos no Censo Electoral de Residentes Ausentes, CERA. O electorado contará con preto de 35 millóns de papeletas e tres millóns e medio de sobres de votación.

Ademais, sinalaron que para a recollida da información habilitouse un dispositivo do que forman parte 2.716 representantes da administración, que por primeira vez nas eleccións galegas contarán cada un cunha tableta para a transmisión de datos da votación dende os colexios electorais ata o centro de procesamento da información.

Está previsto que ao longo do día de mañá se produzan polo menos catro comparecencias dos responsables da Xunta. A primeira ás 10,15 horas para dar conta da apertura de mesas e posibles incidencias; outras dúas para trasladar os avances de participación, ás 12,30 e ás 17,30; e outra máis unha vez o reconto estea avanzando para informar dos resultados do escrutinio.

Ademais, todos os cidadáns poderán ter acceso aos datos en tempo real na páxina web http://resultados2016.xunta.gal, onde se ofrecerán datos do escrutinio provisional a nivel autonómico, provincial, comarcal e por concellos e datos de participación segundo se vaian recibindo. A web será accesible desde dispositivos móbiles como smartphones ou tabletas e permitirá seguir tamén as roldas de prensa, tanto en directo como en diferido.