A Concellería de Vías e Obras, que dirixe Manuel Carrera, ven de rematar, con cargo a unha subvención da Axencia Galega de Desenvolvemento Rural, dentro do Plan Marco, a mellora da estrada que transita polas Insuas, na parroquia de Atios.

Cun orzamento total de 81.605 €, foi posible actuar en máis dun quilómetro no que se fixo o cambio do pavimento, o aumento do ancho do vial, nalgún treito ata dous metros, supresión de curvas, retirada de obstáculos, limpeza, establecemento de beirarrúas e pintado.

Como subliña Manuel Carrera, esta actuación puido levarse adiante grazas a cesión de terreo, “de xeito desinteresado, sen compensación económica”, por parte dos veciños que “levaban anos reivindicando a mellora desta estrada” na que hai zonas de especial perigo para a circulación.

Acabar con esta perigrosidade e garantir a seguridade víal foi o obxectivo principal da obra, que terá continuidade nos vindeiros meses, aproveitando que se cumpren os requisitos establecidos pola Axencia Galega de Desenvolvemento, que fixa, entre eles que o vial dea entrada a explotacións agrícolas, gandeiras ou, como neste caso, a montes veciñais.

Aproveitando as obras, o Concello acometeu, ademais, a colocación do saneamento para varias vivendas que, dende agora, ademais de entrada dende a nova estrada, disporán xa dun subministro de auga igual que o resto das veciñas e veciños do Porriño.