A Federación Galega de Comercio, en colaboración coa Consellería de Economía, Emprego e Industria- Dirección Xeral de Comercio da Xunta de Galicia, entregarán hoxe xoves, 13 de outubro, a partir das 20.30 horas no auditorio de Afundación en Vigo (Rúa Policarpo Sanz, 26) os Premios Traxectoria do Comercio Galego, correspondentes á provincia de Pontevedra.

Entregaranse un total de 22 distincións. A maior parte corresponderán a empresas comerciais da provincia de Pontevedra con longa e/ou prestixiosa actividade comercial, como son: Relojería González (Vigo), Carnicería Cambeiro (Vigo), Joyería Ramón Fernández (Vigo), Almar (Vigo), Calzados Pedestal (Pontevedra), Guarnicionería Mouriño (Pontevedra), Olbe Textil (Pontevedra), Altamar (A Guarda), Joyería Villar (Cambados), Gosende (Vilagarcía), Manolo da Morena (Lalín), Cociñas Lume (O Grove), Mara Muebles (O Grove), Indalecio Moda (Cangas), Papelería Imprenta Valverde (Tui), A tenda da Loura (Redondela) e Panadería La Junquera (Redondela).

Así mesmo, premiarase a persoas e entidades que destacan polo traballo en pro do sector e do asociacionismo comercial e a posta en valor do comercio polo miúdo. Entre as primeiras, recibirá un recoñecemento Encarna Álvarez (El Calvario - Vigo) e Ernesto Filgueira (Zona Monumental de Pontevedra). Finalmente, a Autoridad Portuaria de Vigo, Faro de Vigo e ABANCA, serán as entidades premiadas pola súa aportación ó tecido comercial e asociativo pontevedrés.

A entrega dos premios Traxectoria do Comercio Galego correspondentes á provincia de Pontevedra contará coa presencia da directora xeral de Comercio, Sol Vázquez; e distintas autoridades da vida social, política e empresarial da provincia de Pontevedra.

Todos eles acompañarán ó presidente da Federación Galega de Comercio, José María Seijas López; así como ós presidentes das respectivas asociacións de comerciantes locais e sectoriais, neste acto de recoñecemento e homenaxe a todo o comercio da provincia de Pontevedra.