A mosense Coral Polifónica Ventos do Val organiza a XVI Edición do Concerto Coral de Outono. Trátase dun evento musical pensado polos seus organizadores como un xeito de achegar a música na vertente do canto coral a todos os amantes do canto polifónico, así coma aos interesados en coñecelo máis a fondo.

O concerto celebrarase o vindeiro domingo, día 16 de outubro, ás 18.00 horas da tarde no auditorio do centro das Escravas da Virxe Dolorosa, en Petelos-Mos. A entrada será libre e de balde para todas aquelas persoas que desexen asistir, xa que Ventos do Val é unha agrupación sen ánimo de lucro.

Neste acto musical participarán, ademais da anfitriona Coral Ventos do Val de Petelos, a Coral Estradense (A Estrada), e o Coro Rocieiro Virxe do Rocío (Calvario-Vigo). Durante o concerto interpretarase un repertorio variado con cancións populares, galegas, habaneras, zarzuelas, e música de moi variados autores.