Pablo Martínez Lemos, membro do Grupo de Emergencias Supramunicipal (GES) do Val Miñor, parte este domingo cara ao campo de refuxiados de Katsikas, en Grecia, onde pasará 8 días. O bombeiro de 36 anos viaxa como voluntario da “Asociación Participa para la Inclusión Social” xunto a unha fotógrafa e outros dous compañeiros da Coruña co obxectivo de traballar na acumulación e distribución de material que dende hai un ano organiza a Agrupación Integral de Rescate e Emerxencias (AIRE) da Coruña. O Concello de Nigrán, na súa política de concienciación social fronte o drama dos refuxiados, participará no proxecto cunha exposición fotográfica ao seu regreso e diferentes acción divulgativas.

Non é a primeira vez que Pablo afronta este tipo de misión solidaria, en 2011 estivo traballando nunha casa de acollida en Etiopía e, ademáis, é experto en casos de emerxencia e discapacidade.

“É un orgullo e unha sorte contar con xente coma Pablo Martínez no GES do Val Miñor, as súas accións o que reflexan é a profesionalidade desta xente que xa día a día, no seu traballo, arrisca as súas vidas polos demáis. Para nos é unha oportunidade marabillosa contar con él para continuar coa nosa política de concienciación social fronte o drama dos refuxiados, por iso desexamos coñecer a súa experiencia a través dunha posterior exposición fotográfica”, sinalou o alcalde, Juan González. “Dende o Consistorio involucrámonos no proxecto de concienciación social ‘BuscandoaBashar’ e queremos continuar, ademáis asumimos a accesibilidade como eixo da nosa política de ‘Un Nigrán para todos’”, suliñou.

“O mundo non se acaba na nosa cidade, hai xente máis alá que vive moi diferente a nos, que sí temos as necesidades básicas cubertas”, reflexionou Pablo, quen comparte o espíritu solidario coa súa familia. “Todos estamos vinculados profesionalmente a temas sociais e, ao mesmo tempo, participamos en proxectos solidarios”, explicou este bombeiro que, recoñeceu, “este tipo de experiencias cambia o xeito de ver a vida”.