Dende Nigrán Decide aseguran que “os vertidos ao litoral causaron que este verán estivese durante uns días prohibido o baño pola Consellería de Sanidade nunha zona de Nigrán. O goberno municipal, nunha actitude irresponsable, ocultou esta información, poñendo en risco a saúde da veciñanza”.

O grupo municipal conscientes “da necesidade de manter en perfecto estado de limpeza e salubridade as praias de Nigrán como lugar para o lecer e fonte de riqueza e xeración de emprego” vai presentar unha moción para desenvolver un plan de control de vertidos no litoral de Nigrán, pois “a pesar de que o noso grupo leva solicitando ao goberno municipal desde principios deste ano que establecese dito plan, ademais de sinalarlle a existencia de numerosos desaugues que botan auga que sospeitabamos contaminada, o problema da contaminación no litoral de Nigrán non desapareceu”.

De feito, este verán, como “consecuencia da existencia de vertidos ilegais, estivo prohibido o baño durante uns días nunha zona de Nigrán, información que o goberno municipal, poñendo en risco a saúde da veciñanza, ocultou nunha actitude irresponsable, ao non sinalizar a recomendación de non bañarse temporalmente”. Ademaios lembran que “na actualidade descoñécense as causas que motivaron dita contaminación”.

José Cuevas, voceiro de NIGRÁN DECIDE, ten sospeitas de que “non é a primeira vez que acontecen feitos como estes, pois, do mesmo xeito que neste ano a Xunta de Galicia non fai públicos, na súa páxina web, os resultados das análises que motivaron a prohibición do baño, na publicidade que obrigatoriamente ten que facer o Ministerio de Sanidade tampouco figuran a totalidade dos resultados das análises  feitas en Nigrán nos anos 2014 e 2015; para finalizar indicando que os problemas non deben ser ocultados, pois se o risco do que foi advertido o concello chega a materializarse en dano á saúde das persoas, o prexuízo para a imaxe de Nigrán sería irreversible”

Aseguran que até o de agora, “a única actuación coñecida do Goberno Municipal foi o descubrimento, por casualidade”, do vertido que producía o Centro da Terceira Idade, “facendo caso omiso a todos os rogos que lle fixemos no pleno para a elaboración dun plan de control de vertidos ou para fiscalizar o mantemento da rede de saneamento. Tal é a deixadez do goberno municipal que, despois de contestarnos no pleno de setembro do ano 2015 que ían fiscalizar o mantemento da rede de saneamento, un ano máis tarde descoñecen os plans de mantemento de dita rede”.

En concreto, a moción que presenta NIGRÁN DECIDE, para ser debatida no próximo pleno, pedirá que se cumpra o Decreto 141/2012 polo que se aproba o Regulamento marco do Servizo Público de Saneamento e Depuración de Augas Residuais de Galicia, por parte da entidade xestora e das persoas usuarias que non teñan sistemas propios de tratamento das augas residuais, un control regular, real e efectivo do mantemento da rede de saneamento por parte do Concello, un programa de análises das canles e zonas de baño de Nigrán, así como de todos aqueles vertidos que hai en Nigrán; un programa periódico de inspeccións sobre aqueles vertidos ao litoral ou os ríos, unha investigación pública das características, do funcionamento e do uso da EDAR de Nigrán dende a súa entrada en funcionamento ata hoxe e, sobre todo, na última década.

Para finalizar van a pedir que “se establezan cantas medidas sexan necesarias para a detección e control dos vertidos que se poidan realizar a partir da rede de saneamento, como por exemplo a partir dos aliviadoiros dos correspondentes sistemas de bombeo instalados no concello de Nigrán”.