A presidenta da Deputación de Pontevedra, Carmela Silva, presentou esta semana o I Certame Xuvenil DepoRúarte, que terá lugar o vindeiro 21 de outubro, entre as 11:30 e as 13:00, na Avenida de Montero Ríos de Pontevedra.  Silva convidou a todas as mozas e mozos da provincia a sumarse a esta iniciativa "para que as actividades de socialización ligadas á cultura urbana estean presentes nas administracións".

O I Certame xuvenil DepoRúarte será o colofón da primeira edición do programa do servizo de cohesión social e xuventude e servirá para que as mozas e mozos da provincia que participaron no mesmo demostren as destrezas adquiridas.

A primeira edición do programa DepoRúarte, cun orzamento de 100.000 €, tiña por obxectivo fomentar a participación activa das mozas e mozos, de entre 14 e 30 anos dos concellos de menos de 50.000 habitantes, en actividades modernas e innovadoras, dinamizadoras e educativas, atendendo as súas demandas, ofrecéndolles un espazo de encontro e novas alternativas de lecer. De feito, DepoRúarte contaba con actividades relacionadas coa música e baile, arte urbana, creatividade, deporte e cociña. En total impartíronse 28 cursos nos que participaron 450 alumnas e alumnos de concellos da provincia.

No I Certame DepoRúarte, ademais de poder ver todo o que aprendeu o alumnado participante no programa, as mozas e mozos que asistan poderán gozar de clases maxistrais de grafitti, hip-hop e funky. Ó respecto, a Presidenta da Deputación, Carmela Silva manifestou o seu desexo para que "o certame sirva de punto de encontro da mocidade e contribúa a promover, xerar e articular espazos públicos integrais para a xuventude".