O edificio Multiusos das Pozas e está a ser obxecto de obras de arranxo e mellora da súa cuberta, tal e como  informaba a alcaldesa de Mos, Nidia Arévalo.

O Multiusos, sito nas Pozas, parroquia de Petelos; requería dunha reforma integral da súa cuberta por sufrir filtracións de auga.

Os traballos de optimización, que estarán rematados antes de finais do presente mes de outubro, son posibles grazas a un convenio de colaboración entre a administración local mosense e a Vicepresidencia e consellería de Presidencia, Administracións Públicas e Xustiza da Xunta de Galicia, que financia este proxecto cunha contía de 18.000 euros.

A obra consta da instalación dunha solución de chapa nervada galvanizada con acabado lacado disposta sobre rastreles, reforma das canles de recollida das augas e remates perimetrais sobre os muros, tamén de chapa galvanizada, con acabado lacado de cor gris, todo sobre a cuberta existente. A realización das referidas obras suporá unha mellora na eficiencia enerxética do edificio debido a que se reducirá a demanda enerxética de calefacción do mesmo.

O convenio, asinado pola rexedora local mosense e o vicepresidente da Xunta, Alfonso Rueda, dá resposta á necesidade exposta polo Concello de Mos de executar o devandito proxecto para resolver os problemas de filtracións a través da cuberta do corpo do auditorio.

Os asentamentos diferenciáis do edificio, o tempo transcorrido dende a súa construcción e as deficiencias na estrutura provocaron danos causados pola entrada de auga ao interior do edificio. Coa intervención que se está realizar resólvense os problemas de filtracións descritos, a través dunha solución bastante económica pero que á vez evita danos maiores na cuberta.

Esta obra de reforma responde á razón de interese público por tratarse o Multiusos dun edificio no que se desenvolven un gran número de actividades e actos divulgativos, culturais, espectáculos e actividades recreativas, exposicións, ademais de albergar dependencias municipais da concellería de Educación e Participación Cidadá e da OMIX e acoller as oficinas de ASOMAMOS, Asociación de Maiores, Pensionistas e Xubilados de Mos.

Pola súa banda, esta actuación resulta de interese para a Xunta de Galicia porque supón a potenciación e apoio á prestación de servizos por parte do Concello, administración máis próxima aos cidadáns.