O Concello de Tui convoca as axudas para os alumnos dos dous centros de estudos musicais da cidade, o Conservatorio Profesional e a Escola de Música, para o curso 2016-2017 ao que destina un total de 7 mil euros.  As bases desta convocatoria veñen hoxe publicadas no Boletín Oficial da Provincia de Pontevedra, e pódense consultar tamén no taboleiro de anuncios do concello ou na web municipal.

O obxectivo desta convocatoria é chegar a aquelas familias que realmente precisen a axuda, que os alumnos pertencentes a familias con baixo nivel de ingresos teñan acceso á bolsa, realizar un seguimento daquelas familias que se detecten de alto risco, e analizar a poboación demandante e valorar a súa necesidades.
Poden solicitar estas axudas os alumnos tanto do Conservatorio Profesional de Grao Medio coma da Escola de Música, que estean empadroados en Tui, teñan o curso completo 2015/16 aprobado e que os ingresos da unidade familiar non superen 3 veces o IPREM (22.365,42€).

As solicitudes poden presentarse dende hoxe e ata o xoves 24 de novembro no rexistro de entrada da casa do concello. Deberase achegar o modelo oficial de solicitude, xunto a fotocopia do DNI, NIE ou pasaporte, e no caso de menores o libro de familia. Tamén deberá presentarse xustificación dos ingresos, copia da matrícula deste curso, entre outros documentos que se poden consultar na bases.