O Concello do Porriño, por medio da Concellería de Igualdade, que dirixe Soledad Girón, ven de iniciar a elaboración do III Plan de Igualdade de Oportunidades co financiamento da Deputación de Pontevedra.

O Plan, sinala a concelleira, abranguerá unha “cantidade notábel de medidas dirixidas a promover unha igualdade real e efectiva entre os homes e mulleres do Porriño”. A intención do Goberno local é que o Plan sexa “ferramenta estratéxica” de traballo que terá coma finalidade axustarse á realidade e adaptarse ás necesidades da vila neste eido e neste momento.

Soledad Girón explica que o Plan de Igualdade de Oportunidades estará artellarase en tres áreas: a de Promoción da Igualdade de Mulleres e Homes, co obxectivo de “xerar un cambio de valores que fomente a eliminación dos estereotipos de xénero”; a Área de de Participación Social e Empoderamento, para impulsar a participación da cidadanía na loita para acadar a igualdade de mulleres e homes e, finalmente a Área de Concienciación Social e Prevención da Violencia de Xénero, coa finalidade de concienciar á sociedade sobre a violencia de xénero coma a expresión máxima da desigualdade entre mulleres e homes.