Onte presentábase o programa de actos organizado con motivo do Día Internacional contra a Violencia de Xénero, que se conmemora o vindeiro día 25 do presente mes de novembro.

Entre as actividades que se realizarán este ano atópase representación dunha obra de teatro que terá lugar mañá mesmo, sábado 19 de novembro. O título da peza é ‘A Nosa Veciña’, e corre a cargo do Grupo de Teatro de Mulleres de Mos.

Dará comezo ás 20.30 horas no auditorio do Multiusos das Pozas, con entrada libre e de balde para todo o público asistente.

As ‘ghaliñas’ de Mos volven á escena. Mañá veñen contar a historia de María, unha muller ama de casa, utilizada e reprimida polo seu marido. Unha sátira social de Darío Fó en código de traxicomedia que fará aos espectadores reflexionar sobre un dos problemas máis importantes dos nosos días, o machismo.