O Grupo de Menores da Policía Autonómica levou a cabo durante esta fin de semana  varios dispositivos de control de menores nas cidades de  Lugo, Pontevedra, Vigo, Marín e Caldas de Reis. Por parte dos distintos Grupos de Menores da Policía Autonómica de Lugo, Pontevedra e Vigo nesta pasada fin de semana, realizáronse seis dispositivos de control de menores en risco de desamparo, consumo de alcohol e drogas en menores de idade, nos que foron identificadas 48 persoas e 50 locais foron inspeccionados.

Foron levantadas 3 Actas de infraccións á Lei 11/2010 a locais por carecer de carteis e 3 actas de infraccións Lei 4/ 2015 de Protección da Seguridade Cidadá por tenza de sustancias estupefacientes e consumo, sendo intervidas unha bolsiña que contiña 5,75 gramos dunha sustancia ao parecer marihuana, e outra bolsiña con 8,08 gramos dunha sustancia ao parecer haxix.

Con motivo da entrada en vigor da Lei 11/2010, de prevención de bebidas alcohólicas aos menores de idade, por parte da Policia Autonómica estanse a levar a cabo diversos dispositivos policiais por toda a Comunidade Galega, para velar polo cumprimento da mesma e previr o consumo deste tipo de bebidas polos menores de idade.

Nestes dispositivos, ademais das denuncias pola infracción da Lei 11/2010, tamén se informa aos propietarios dos locais do seu contido, das actuacións que deben levar a cabo para o cumprimento da mesma e evitar o consumo de alcohol entre os menores de idade, así como, que por parte da Policía Autonómica se continuará coas actividades necesarias para velar polo cumprimento da norma.