O Pleno da Corporación Municipal de Mos aprobou por unanimidade na sesión desta tarde amosar o seu apoio e solidariedade aos veciños das zonas afectadas ante a recente oleada de roubos e solicitar ao Ministerio de Interior o reforzo dos efectivos de vixilancia no Concello de Mos.

Ante a última oleada de roubos acontecida no barrio da Gándara, na Parroquia de Mos (9 en menos dun mes), o Pleno da Corporación Municipal manifestou a solidaridade e apoio dos corporativos aos veciños e veciñas das zonas do Concello afectadas e decidiu solicitar o reforzo da seguridade por parte do Ministerio de Interior para tranquilidade da veciñanza.

A alarma veciñal é evidente, xa que os habitantes da Gándara víronse obrigados a constituír unha patrulla cidadá de vixilancia. “Unha preocupación totalmente xustificable e xustificada ante a que queremos presentarlles todo o noso apoio, tanto a eles coma os habitantes doutras zonas do municipio perxudicadas por roubos”, explicou a alcaldesa, Nidia Arévalo.

Así mesmo, dito apoio maniféstase tamén na búsqueda dunha solución mediante o requerimento ao Ministerio do Interior dun reforzo e intensificación da vixilancia na localidade por parte dos Corpos e Forzas de Seguridade do Estado, dada a situación extraordinaria que repercute nun elevado número de afectados.