O Concello do Porriño axudará á distribución de ‘Querida Gina,’ a película protagonizada por Juan Sánchez e Serafín Rodríguez, veciños de Cans, e que narra a aventura que viviron viaxando de O Porriño a Roma para coñecer á súa admirada Gina Lollobrigida, á que viran cando fixeran de extras na película ‘Salomón e a raíña de Saba’, rodada en Zaragoza no ano 1959.

Este é o compromiso ao que chegou o Goberno local coa directora do filme, que voltará a O Porriño o mes de xaneiro para estar presente na proxección da cinta no Centro Cultural Municipal.

Susana Sotelo agradeceu ao Concello do Porriño o apoio que deu á candidatura de ‘Querida Gina’ a sete nominacións aos Premios Goya, nominacións que, finalmente, non acadou, un apoio, sinalou, que foi moi importante para todas as persoas que participaron na película e que axudou a facer visible a mesma.

A directora solicitou a colaboración do Concello para a distribución da cinta que, subliñou, é agora a principal preocupación do seu equipo, “queremos que chegue aos espectadores e que o maior número de persoas posible poidan coñecer a historia de Juan e Serafín”.

O Goberno local reafirmou o seu compromiso coa película, pasadas xa as candidaturas aos premios da Academia de Cine, e asegurou a Susana Sotelo que botará unha man para que ‘Querida Gina’ poida verse no maior número de lugares posíbeis.