A Presidenta da Deputación de Pontevedra, Carmela Silva, manifestou hoxe a súa máis enérxica repulsa polo asasinato de Ana Enjamio, a xoven de 25 anos que apareceu morta a pasada madrugada no portal do seu domicilio da  Avenida de Madrid, en Vigo despois de recibir varias coiteladas. Silva expresou o seu pesar e o de todo o goberno provincial “por un novo caso de violencia contra as mulleres, que se suma á agresión do venres en Santiago doutra xoven que está ferida moi grave”.

A presidenta da Deputación expresou a súa condea por este novo asasinato “que volve a deixar moi clara a necesidade de que temos que poñernos dacordo para loitar contra esta lacra aínda con máis forza, con máis medios, con máis recursos e tendo claro que non podemos ter unha prioridade maior. Están a matarnos e non nos podemos quedar mirando, insistiu Silva.

A Presidenta provincial, que trasladau á familia de Ana Enjamio a solidariedade e o apoio de todo o goberno da Deputación, volveu a exixir “un gran pacto de estado que permita que todas as administracións establezan prioridades, unha maior vontade política e unha implicación real para acabar con este goteo continuo de mortes”