Ante a constitución, esta mañá, da Xunta de Goberno da Área Metropolitana de Vigo sen os alcaldes do Partido Popular a alcaldesa de Mos, Nidia Arévalo, manifestou o seu sentir respecto da situación na que se atopa a Área tras esta primeira Xunta de Goberno presidida por Abel Caballero e coas ausencias de Redondela, Mos, Soutomaior, Salvaterra, Pazos de Borbén e Baiona.

A rexedora local mosense calificou a esta Área Metropolitana como un “Área amputada” polo señor Abel Caballero, amputada tanto en número de membros como no seu motor fundamental e sen o cal non ten sentido este novo ente: o transporte.

Arévalo considera a actitude do alcalde de Vigo como “unha estratexia clara de confrontación co fin único de obter repercusión mediática, así como de crearse un ‘chiringuito’ propio, por e para el, e que poida manexar ó seu antoxo”.

Instiste Nidia Arévalo en que “unha Área sen Vigo no Transporte Metropolitano e sen case a metade dos seus membros non ten sentido e nace como crónica dunha morte anunciada, a non ser que o rexedor vigués recapacite e rectifique”, di.

“Mal que lle pese ao señor Caballero, os veciños e veciñas de todos os municipios da Área Metropolitana imos á cidade olívica a facer Vigo: a consumir e deixar os nosos cartos en Vigo, por iso invítoo a que imaxine un solo día en que ningún dos habitantes dos 13 concellos restantes fóse a Vigo, como se atoparían as rúas, os negocios, os parkings, as empresas, etc.; creo que se levaría unha sorpresa”, declarou a alcaldesa.

    Así que, unha vez máis, Arévalo insta ao alcalde de Vigo a que incorpore o transporte urbano ao Plan de Transporte Metropolitano nos termos acordados con todos os alcaldes e asinados, a que cese na intención de adoptar medidas discriminatorias que pretenden converter aos veciños do Concello de Mos en cidadáns de segunda categoría. Esíxelle a integración efectiva do Transporte Urbano de Vigo no Plan de Transporte Metropolitano de Galicia, cesando a discriminación dos veciños mosenses no uso do mesmo.

Nidia Arévalo argumenta a este respecto que “non lle estamos esixindo ao Concello de Vigo nada que o seu alcalde, Abel Caballero, non asinase previamente no convenio coa Xunta de Galicia”. “Simplemente lle pedimos que cumpla o que está asinado”, destaca.

Pola súa banda a rexedora local mosense declara que “simplemente reivindicamos que respecto do Transporte Metropolitano os veciños de Mos non somos nin máis nin menos que os de Vigo, somos iguais; e así debemos facelo valer”. Explicou tamén que nas outras Áreas Metropolitanas de Galicia as cidades cabeceira das mesmas, como son Santiago, A Coruña, e Lugo participan no transporte en igualdade de condicións que o resto de concellos membros; polo que Vigo ten que proceder de igual xeito “e non querer o señor Caballero enganarnos a todos e rirse dos máis de 15.000 veciños de Mos”.

Nidia Arévalo informou ademais de que “o Concello de Mos leva pagando o Transporte Metropolitano un ano e medio, cousa que non fixo o de Vigo; e lembroulle a Abel Caballero que existe unha Lei da Área Metropolitana e que as normas están para cumplilas”.

O que a súa alcaldesa reclama para os mosenses é igualdade de condicións cos veciños/as de Vigo e non ter que pagar case o triple (2,17€ por traxecto ata a farola de Urzaiz-Príncipe) do que pagarían se o señor Caballero cumprise a Lei da Área Metropolitana entrando, como sería lóxico, no Transporte Metropolitano (0,85€ por traxecto ata a farola de Urzaiz-Príncipe). Pretende loitar polos dereitos dos habitantes de Mos, para que non sexan tratados como cidadáns metropolitanos de segunda, en contraposición dos de primeira que serían os vigueses.

A intención do Concello de Vigo e do seu alcalde, Abel Caballero, é que non paguen o mesmo prezo de 0,85 euros polo Transporte Metropolitano todos cidadáns dos diferentes concellos da Área. Considérase que, de producirse dita situación, estarían a existir cidadáns de primeira (os veciños e veciñas de Vigo) e de segunda (os dos demais municipios da Área Metropolitana).

 A Tarxeta Metropolitana de transporte ten que ser común a todos e servir para viaxar por tódolos concellos metropolitanos. Con ela todos os usuarios teñen que ter os mesmos beneficios e condicións, entre eles a tarifa única de 0,85 euros; ó igual que se habitantes de fóra de Mos e integrantes da Área viaxan no Transporte Metropolitano enlazando co bus urbano mosense, ó facer trasbordo a este último van a recibir o mesmo trato e viaxar nas mesmas circunstancias que se fosen veciños de Mos.

Ademais é que o que se pretende dende a alcaldía de Vigo é ilegal, ao contradecir a reforma da Lei da Área Metropolitana de Vigo, aprobada polo Parlamento de Galicia, nos seguintes puntos:

1. “A efectiva posta en funcionamento da Área Metropolitana de Vigo requerirá a previa integración efectiva do transporte urbano de Vigo no Plan de Transporte Metropolitano de Galicia, logo da formalización do correspondente convenio de adhesión entre a Xunta de Galicia e o Concello. Esta incorporación realizarase nas mesmas condicións ca o resto dos concellos galegos adheridos ao plan, garantindo a igualdade de tratamento de todas as persoas usuarias”.

2. “Esta incorporación non supoñerá ningún incremento na achega prevista no Plan de Transporte Metropolitano de Galicia para a Xunta de Galicia ou para os outros concellos, nin ningunha limitación ao numero de persoas usuarias."

É certo que moitos máis viaxeiros se dirixirán a Vigo que ao resto de localidades, pero é o normal posto que é a cidade cabeceira da Área Metropolitana, e as mesmas condicións para todos os cidadáns metropolitanos forman parte do asinado no convenio; convenio que ten que ser cumprido por tódalas partes, xa que a lei é igual para todos.

O feito de establecer distintas tarifas para o Transporte Metropolitano, en función de que o usuario do mesmo esté empadroado en Vigo ou en outro lugar, supón o incumprimento das condicións establecidas no convenio de adhesión do Concello de Vigo ao Plan de Transporte Metropolitano de Galicia, e en consecuencia, o incumprimento do establecido na Disposición Adicional Decimoprimeira da Lei 4/2016, do 27 de xullo, pola que se modifica a Lei 4/2012, do 12 de abril, da Área Metropolitana de Vigo.

Circunstancia que ten que ter consecuencias legais, especialmente se a diferenciación de tarifas indicada incumpre os termos do convenio de adhesión ao Transporte Metropolitano de Galicia.

Vigo ten que ser igual que outras cidades de Galicia que teñen Transporte Metropolitano e nas que as tarifas para viaxar nel son exactamente iguais para tódolos cidadáns metropolitanos, procedan do municipio que procedan.