De total asombro foi a reacción da alcaldesa de Mos, Nidia Arévalo, ante as declaracións dos socialistas mosenses que acusan ao goberno local de “facer a vista gorda” co Ministerio de Fomento ante unhas farolas que se atopan apagadas nas entradas das autovías A-55 e A-52.

En primeiro lugar aclarou a rexedora local aos socialistas mosenses que de “vista gorda” nada, pois a avería púxose en coñecemento do Ministerio e estáselle a facer seguemento para que sexa reparada canto antes.
“Nin eu me chamo María Jesús Escudero nin o presidente do Goberno é José Luis Rodríguez Zapatero, así que pídolles respecto, señores do PSOE; bromas as xustas”. Así de contundente foi a alcaldesa de Mos respecto das desafortunadas declaracións dos socialistas de Mos.

En segundo lugar Arévalo quixo aclarar que “o PSOE non é quen de poñer en dúbida a miña defensa do municipio, porque a única alcaldesa que fixo a vista gorda pregándose a cores políticos foi a rexedora socialista que, pola súa actitude de complacencia cos gobernos centrais do momento (socialistas tamén) consentiu e asinou proxectos nefastos para Mos e mantivo bloqueados outros de vital importancia para o municipio”.

Así, estando o Concello de Mos gobernado polo PSOE, aprobouse o trazado da nova autovía Vigo-Porriño que houbese sido un absoluto desastre para Mos e que Nidia Arévalo logrou evitar fai dous anos coa colaboración da entón ministra de Fomento, Ana Pastor.

Durante estes anos na alcaldía de Arévalo desbloqueáronse asuntos capitais para a localidade mosense, que levaban paralizados dende o goberno local previo cunha socialista ao frente. Tal é o caso do acceso dende a estrada Nacional 550 ao Cemiterio Municipal de Mos.

Outros proxectos promovidos por Fomento dende que Nidia Arévalo é alcaldesa foron o acceso a San Eleuterio dende a autovía A-55, a rotonda en Sanguiñeda que regula o tráfico na intersección que une a saída da autovía A-55 e a Avenida de Sanguiñeda, a pasarela proxectada para Amieirolongo, etc.

Por todo isto a rexedora local mosense asómbrase e pregúntase “quen foi a falar”, porque precisamente o que queren os socialistas denunciar do goberno popular foi precisamente o que fixo o PSOE cando estaba na Alcaldía de Mos.

“Nada de vista gorda nin de complacencia política”, sentencia Arévalo, “non nos acusen a nós do que fixeron vostedes, ata ahí podíamos chegar”.

A alcaldesa de Mos considera que os membros do PSOE "deberían rectificar ante semellantes declaracións das que deberían avergoñarse".