Os concellos de Cerdedo-Cotobade e de Ponte Caldelas inician esta semana, a partir do luns 9 de xaneiro, dous novos obradoiros ao abeiro do programa “Tecendo lazos”, de fomento do envellecemento activo, elaborado polo servizo de Cohesión Social e Xuventude da Deputación de Pontevedra. Trátase, ademais, das últimas actividades celebradas ao abeiro do programa “Tecendo lazos” despois de que o goberno provincial aprobase a ampliación do prazo de impartición de 16 dos seus obradoiros dende o 31 de decembro ata o 15 de xaneiro.

En canto ás actividades que se levarán a cabo esta semana para pechar o programa, a que se desenvolverá en Cerdedo-Cotobade leva por título “Larpeiradas da terra”, dentro da área temática “Coas mans nos pucheiros” e, a que terá lugar en Ponte Caldelas, leva por título “Obradoiro de percusión tradicional” e forma parte da área de “O noso son”. Ambas as dúas actividades impartiranse en horario de tarde, de luns a venres e nelas participarán, respectivamente, quince e oito veciñas e veciños da vila. No caso de Cerdedo-Cotobade, esta é a segunda actividade que celebra este concello no marco de “Tecendo lazos”, ao ser unha das tres vilas (xunto con Nigrán e O Rosal) que solicitaron poder impartir un segundo obradoiro debido á alta demanda de participación que houbo neles.

A Presidenta da Deputación de Pontevedra, Carmela Silva, sinalou que “participaron en total 501 persoas nos 25 obradoiros que se celebraron” (unha media de 20 participantes por actividade, dun máximo de 30). Isto, sinalou Carmela Silva, “amosa unha vez máis o grande éxito das iniciativas desta institución pública” que, asegurou, “elabora programas moi relevantes para a sociedade como no caso deste Tecendo lazos, que permitiu que as distintas xeracións se puxesen en contacto para que as máis novas poidan aprender das maiores e que estas se sintan moito máis integradas e útiles, permitindo que todo o coñecemento que levan acumulado durante anos non se perda e forme parte das achegas que facemos entre todas e todos á hora de construír sociedades mellores”.

Lembramos que o programa “Tecendo lazos” naceu co obxectivo de mellorar a actividade física, cognitiva e social das persoas maiores e, entre as máis novas, as súas habilidades sociais e empatía de cara ao resto das xeracións, así como o de ofrecer un espazo de encontro e intercambio de experiencias que potencien movementos de participación e cooperación social a través dos obradoiros. Cun orzamento de 60.000 euros, estivo dirixido ás persoas residentes nos concellos de menos de 20.000 habitantes da provincia.