Unha colisión entre dous turismos deixa unha persoa ferida en Redondela. Debido ao impacto, o ferido quedou atrapado no interior dun dos vehículos e tivo que ser excarcerado polos Bombeiros de Vigo. 

O accidente ocorreu sobre as 14:30 horas desta tarde, á altura de Rande, no termo municipal pontevedrés de Redondela. O Centro de Atención ás Emerxencias de Galicia (CAE 112 Galicia) tivo constancia do suceso grazas á chamada dun particular, e, a partir de aí, puxo en marcha o operativo.

Ata o punto, achegáronse ademais dos Bombeiros de Vigo, Urxencias Médicas, a Policía Local e os efectivos de Protección Civil de Redondela. Tamén, dende o CAE 112 Galicia informouse aos Bombeiros de Baixo Miño e aos axentes de Garda Civil de Tráfico.