Aproveitando o inicio da reestructuración das dúas liñas de bus urbano municipal que hoxe se produciu e que o mesmo xa ten instaladas as canceladoras homologadas para as tarxetas do transporte metropolitano, a alcaldesa de Mos, Nidia Arévalo, comparou o seu Concello co de Vigo e lembroulle ó seu rexedor, Abel Caballero, “que dende que el asinou o convenio do Transporte Metropolitano, o 6 de xullo de 2016 (fai máis de seis meses), nin instalou as máquinas canceladoras nin fixo ningunha outra cousa ao respecto; mentres que Mos, un Concello pequeno e que levou o convenio do Transporte Metropolitano a aprobación ao Pleno do pasado mes de decembro, xa as ten instaladas”.

Ademais aledouse Arévalo de que o alcalde de Vigo parece que está a reconsiderar a súa postura respecto do Transporte Metropolitano, pois o pasado venres aparecía nos medios de comunicación asegurando que “es mi modelo” e que “las tarifas son idénticas a las que plantea Vigo”.

“Deste xeito, vista a aparente e nova boa disposición do alcalde de Vigo e ante a Comisión de Seguemento do Transporte Metropolitano que se celebrará mañá pola mañá na Delegación da Xunta de Galicia en Vigo e á que estamos convocados os 14 alcaldes da Área, espero que o Señor Abel Caballero asista, en primeiro lugar, e en segundo lugar que anuncie a data de incorporación do Concello de Vigo ao Transporte Metropolitano”, declarou Nidia Arévalo.

Concluiu a rexedora local mosense co seu desexo de que este feito se produza canto antes polo ben común dos 14 municipios metropolitanos e dos seus veciños e veciñas e insistiu en que o verdadeiro sentido da Área Metropolitana é o ‘Quid pro Quo’, dar todos para tamén recibir todos. “Se todos, e cando digo todos é todos, poñemos da nosa parte; poderemos crear un gran futuro de servizos comúns que redunden na calidade de vida dos cidadáns, que deben ser a nosa prioridade”.