A II Feira Profesional de Maquinaria, Agricultura e Gandería, Abanca Cimag-GandAgro 2017, a cal se celebrará do 26 ao 28 de xaneiro na Feira Internacional de Galicia ABANCA, acollerá durante o seu primeiro día a VIII Xornada Técnica para Responsables de Calidade dos Operadores e Fabricantes de Penso de gmp.Galis, un programa de autocontrol sectorial que garante a seguridade alimentaria nas fábricas de pensos.

A xornada será presentada por Bruno Beade, director da Asociación Galega de Fabricantes de Alimentos Compostos (Agafac) e gmp.Galis, organizadores deste encontro, e continuará coa presentación do Proxecto Galac, “Tecnoloxías para a detección rápida e control sectorial do impacto das micotoxinas na nutrición animal en Galicia”. O encargado de expoñelo será Enrique Taboada, xefe da área Noroeste de Imasde Agroalimentaria e colaborador da Comisión Técnica de AGAFAC e do programa gmp.Galis.

Pola súa banda, Gerardo Rivero, xefe do servizo de Seguridade Alimentaria nas Producións Gandeiras da Consellería do Medio Rural, abordará o plan de control reforzado de aflatoxinas en leite e as recomendacións ante a detección de micotoxinas en niveis elevados. Seguirao Luisa Delgado, responsable do departamento técnico das entidades organizadoras da xornada, quen realizará unha análise  de datos nutricionais e microbiolóxicos de gmp.Galis no período 2006-2014.

Para rematar, Vicente Dopico, director de Formación Galega de Mercancías Perigosas, ofrecerá una charla sobre as obrigas legais en relación á normativa ADR sobre mercancías perigosas e CLP sobre clasificación, etiquetado e envasado das mesmas.

Avicultura

Xa orientada a outro colectivo profesional, os avicultores, a feira acollerá outra xornada. No seu marco Miguel Ánges Bonilla, de Exafan,  empresa organizadora das conferencias, dará a coñecer as novidades en equipamento avícola.  Ademais, Óscar Cebrián falará das tendencias en climatización en granxas de avicultura e das prestacións do sistema de control avícola da firma, o SCA,  baixo o título “A Nube a través do SCA. Big Data”.

Ambas xornadas forman parte do completo programa de conferencias que se desenvolverá nesta segunda edición de Abanca Cimag-GandAgro