Un colexio de Mos situado no lugar do Castro foi evacuado esta mañá tras declararse un incendio nunha das súas aulas. Afortunadamente, ninguén se viu afectado. Os Bombeiros que se desprazaron ao punto, tras ser alertados polo 112 Galicia confirmaron que ardeu, unicamente, un moble dunha das aulas que o propio persoal de mantemento logrou extinguir. Unha vez ventilado o centro os cativos retomaron a actividade con total normalidade.

Ás 10:30 horas de hoxe, membros do Servizo de Emerxencias de Mos informaban ao 112 Galicia do incendio. Indicaban que o centro xa estaba evacuado e o lume concentrábase na planta baixa.  A partir de aí, dende o Centro de Atención ás Emerxencias do 112 pasouse aviso,  de inmediato, aos Bombeiros do Porriño e á Policía Local que xa aseguraban ter constancia do suceso.  Ademais, alertouse a Urxencias Médicas e aos Bombeiros de Vigo.