A Presidenta da Deputación de Pontevedra, Carmela Silva, anunciou que a Xunta de Goberno da institución provincial vai aprobar as bases da segunda edición de “Depo en marcha”, un programa xestionado a través do servizo de cohesión social e xuventude e ó que se destinarán 120.000 €.

Carmela Silva manifestou que “vivimos nunha sociedade cada vez máis envellecida que precisa de servizos, plans e programas adaptados ás súas necesidades”. Neste contexto, a Presidenta da Deputación asegurou que “Depo en marcha” ten por finalidade favorecer o envellecemento activo das persoas da provincia a través de obradoiros que queren “contribuír a optimizar as oportunidades de saúde, participación e seguridade da terceira idade así como establecer relacións sociais, favorecer a participación en actividades que melloren o seu estado anímico, potenciar movementos de participación e cooperación social, promover espazos de encontro e intercambio de experiencias e favorecer a independencia das persoas maiores, para evitar o seu illamento e situacións de soidade”.

Na área de “Traballando coas mans” a Deputación de Pontevedra ofertará cursos relacionados con arte con flores, cestería, elaboración de xabóns, encaixe de bolillos, restauración de mobles, tapicería e manualidades.  “Entre fogóns” centrarase na cociña galega, na elaboración de conservas artesanais e licores caseiros así como panadería, repostería, tapiñas e petiscos.  A través de “Aprendendo da natureza” os participantes no programa coñecerán prantas mediciñais e de “Móvete” aprenderán a practicar pilates, ioga, ximnasia de mantemento e zumba.

Pola súa banda, na área de “Activando corpo e mente” a institución provincial ofertará cursos relacionados coa conservación da memoria, musicoterapia, risoterapia e control e manexo da ansiedade e o estrés. “Enredando” centrarase nos xogos tradicionais e no teatro e “Dálle marcha” nos bailes de salón, pandeireta e canto popular”. A través de “En rede” os participantes en “Depo en marcha” coñecerán o funcionamento de Internet así como do correo electrónico, do teléfono móbil e informática tanto a nivel iniciación como avanzado.

Os máis de 100 obradoiros que oferta a Deputación de Pontevedra van dirixidos a entidades de persoas maiores, xubiladas e pensionistas da provincia de Pontevedra, concedéndose un obradoiro,de 30 horas e para grupos de entre 20 e 25 persoas, por cada solicitante.

As entidades interesadas en beneficiarse do programa “Depo en marcha” terán que presentar a solicitude de participación nun prazo de 20 días a partir do día seguinte ao da publicación do extracto da convocatoria no BOPPO.