A alcaldesa de Mos, Nidia Arévalo, a concelleira de Urbanismo e Medio Ambiente, Julia Loureiro, a secretaria, o interventor e o arquitecto municipais reuníronse no salón de sesións do Concello con representantes de AEMOS, Asociación de Empresarios, e de varias empresas do Polígono do Rebullón, para abordar a solución ás deficiencias existentes no polígono.

O macroproxecto construtivo, elaborado polo arquitecto do Concello, Manuel Toucedo, xa se atopa totalmente rematado, e conta co visto bo da Dirección Xeral de Enerxía e Minas da consellería de Economía, Emprego e Industria da Xunta de Galicia.

Este macroproxecto consta de tres fases. As dúas primeiras, correspondentes á acometida de servizos, levaranse a cabo inminentemente, neste mesmo ano 2017, e a terceira de humanización realizarase no 2018.

Na primeira fase instalarase toda a rede de saneamento e durante a segunda, aproveitando a apertura das canalizacións para o saneamento, acometerase o soterramento do resto de servizos tales coma telefonía, electricidade, abastecemento de auga potable, etc.

Xa na terceira fase proxectada para o ano que ven realizarase a humanización do Polígono do Rebullón, procedendo a pavimentar, urbanizar e instalar mobiliario urbán nos viais interiores do polígono.

Neste sentido a rexedora local mosense declarou que “por fin, nesta lexislatura quedará ordeado este parque empresarial e cun aspecto e dotacións dun auténtico polígono industrial”. O Concello lidera e coordina este ambicioso proxecto con financiación autonómica na súa maioría, e cunha parte tamén de aportación dos propios empresarios e da administración local.

Para a execución deste macroproxecto solicítase subvención á consellería de Economía, Emprego e Industria con cargo a unha liña de axudas para a mellora de infraestruturas dos parques empresariais da Comunidade Autónoma de Galicia.

Ditas axudas subvencionan o 80% do proxecto aoutorgando ata un máximo de 120.000 euros por municipio e obra, contía coa que se acometerán as primeira e segunda fases, e máis urxentes, das necesidades do Polígono do Rebullón, consistentes na instalación da rede de saneamento de augas fecais; e de soterramento dos demais servizos. Do 20% restante os propios empresarios do Rebullón asumirán o 90%, e o Concello de Mos colaborará aportando un 10%. Deste xeito os empresarios faranse económicamente cargo das partes non subvencionables do proxecto, nas que contarán coa colaboración da administración local mosense.

A terceira fase céntrase, pola súa banda, na mellora do vial central que deberá contemplar todo tipo de traballos de humanización como mellora do firme, acometida de beirrarúas e aparcadoiros, delimitación de vados, optimización do alumeado público, etc.

O custe total dos traballos ascenderá a 480.000 euros.

Por último a rexedora local mosense, Nidia Arévalo, declarou a “necesidade de revalorizar esta zona industrial, estratéxica pola súa ubicación, pero que precisa dunha mellora estructural importante e vital para a subsistencia do polígono”.