O alcalde de Salceda de Caselas, Marcos Besada, acompañado polo Concelleiro de Seguridade, Facenda e Réxime Interior, José Luis González, participou en Bruselas nas sesións de traballo, debate e análise de REALPE, Reunión das Autoridades Locais Progresistas de Europa, respondendo a unha invitación formulada pola eurodeputada da Esquerda Unitaria Europea/Esquerda Verde Nórdica, Lidia Senra.

Marcos Besada presentou neste foro europeo, os traballos e iniciativas que se desenvolven en Salceda de Caselas de cara “a promover unha integración efectiva das persoas que forman parte da Salceda que construímos entre todos e todas”, subliñou.

Así, Besada, falou dos proxectos de Alfabetización de Inmigrantes e de Apoio extraescolar de reforzo lingüístico de nenos e nenas que realizan os voluntarios e voluntarias e que, explicaba o alcalde, “son claves para unha integración efectiva na vida de Salceda”.

Daba conta tamén o rexedor salcedense dos plans de formación que se realizan no CDL ‘O Torrón’ a través de obradoiros de habilidades sociolaborais e de procura de emprego e do traballo que desenvolía o Programa de Alimentos e o Roupeiro Municipal, palabras que foron seguidas con grande interese por parte de todos os presentes.

Marcos Besada amosou a súa satisfacción non só por presentar as numerosas iniciativas que o Executivo local desenvolve de cara a integración real e efectiva dos inmigrantes na vida social, cultural e laboral do municipio, senón tamén polo feito “de poder facelo na nosa lingua, o galego, diante de compañeiros e compañeiras dos 28 países membros da Unión Europea” algo que, subliñaba Besada “produce unha satisfacción moi especial”.