A mostra "Mulleres galegas na historia", que pon en valor a vida e a traxectoria profesional das mulleres galegas máis representativas, poderá visitarse no CEIP de Belesar, no concello de Baiona,  ata o vindeiro 2 de marzo. A exposición foi inaugurada  no propio centro, nun acto encabezado polo deputado de Cultura e Lingua, Xosé Leal, e o alcalde da localidade, Ángel M. Rodal Almuíña. Tamén estiveron presentes a concelleira de Educación, Beatriz González Pérez, a concelleira de Igualdade, M.ª Carmen Paredes Cabral, equipo docente e alumnado do centro educativo.

O alumnado tamén tivo un papel protagonista neste acto público; varias alumnas de quinto e sexto de primaria fixeron unha lectura teatralizada a partir de textos de autoras presentes na propia exposición, coma Maruja Mallo, María Casares e Rosalía de Castro. "Mulleres galegas na historia" complementa as actividades que o CEIP de Belesar está a desenvolver ao longo do ano para visibilizar a muller en diversos ámbitos. Neste sentido, Xosé Leal resaltou "a importancia do papel da muller na cultura dentro dos valores de igualdade que fomenta o centro nas súas actividades durante o 2007".

A exposición está composta por varios paneis que ofrecen, dun xeito sinxelo e comprensible, información sobre figuras femininas de diferentes épocas históricas e que foron referentes en diferentes ámbitos e disciplinas. Os paneis conteñen fotografías e información básica sobre os datos biográficos e o campo no que sobresaen, ao tempo que fai un percorrido dos fitos máis importantes das súas traxectorias vitais e profesionais e, nalgúns casos, inclúe citas e declaracións da muller homenaxeada.

Aínda que as mulleres que se describen nos paneis adoitan ser amplamente coñecidas, a información dos paneis permite afondar no papel que desempeñaron cada unha no contexto e momento histórico no que lle tocou vivir.

A mostra inclúe figuras coma a da soldadeira do medievo María Balteira, a heroína coruñesa María Pita, o papel de María Castaña nas revoltas contra os señores feudais, María Soliña torturada e condenada por bruxería na época da Inquisición, o labor a prol da reforma do sistema penitenciario levado a cabo por Concepción Arenal, a obra das escritoras Emilia Pardo Bazán e Xela Arias, a bailarina da Belle Époque coñecida como La Bella Otero, a mestra Ernestina Otero, a pintora surrealista Maruja Mallo, a mestra e guerrilleira antifranquista Enriqueta Otero, a pintora de natureza María Antonia Dans ou a actriz de teatro María Casares.

"Mulleres galegas na historia" poderá visitarse tanto polo alumnado, no horario escolar do centro, coma pola poboación en xeral, en horario de tarde.