A Presidenta da Deputación de Pontevedra, Carmela Silva, reclamou esta semana “medidas  drásticas” contra a asociación “Hazte Oir” pola campaña que desenvolve cun autobús polas rúas de Madrid contra os dereitos e as liberdades das persoas con orientacións sexuais diferentes. Silva fixo estas declaracións na inauguración, na localidade de Caldas, da exposición “Sorrisos transformadores” que precisamente quere dar visibilidade a diversidade e a prevención de actitudes e de comportamentos discriminatorios pola orientación sexual e a identidade de xénero dos menores. Esta campaña está desenvolvida pola Deputación e a asociación Arela de Familias con Menores Trans.

Carmela Silva foi contundente ao asegurar que  o autobús da asociación “Hazte Oir”  “pretende ir contra os dereitos e liberdades das persoas trans e das persoas con orientacións sexuais diferentes. E insoportable e inadmisible que no século XXI podan acontecer actuacións semellantes”.

A Presidenta da Deputación subliñou que unha sociedade “só é decente,  democrática e avanzada cando respecta a liberdade da xente”. Silva destacou que a campaña con ese autobús vai encontra da propia Constitución Española “que no seu artigo XIV establece a igualdade e a non discriminación por razóns de sexo, raza, relixión, ou económicas polo que ese autobús vai contra un dos dereitos fundamentais dos españois”. Silva manifestou sentirse “avergonzada” como responsable pública porque aínda existan asociacións que defendan posturas semellantes.

As dez fotografías que recolle a exposición “Sorrisos transformadores” amosan dez realidades de persoas trans ou que, sen selo, están relacionadas pola súa profesión na transmisión dunha mensaxe de positivismo e de orgullo sobre este colectivo. Precisamente por ser unha campaña positiva, cada unha das imaxes vai acompañada por un texto: “Trans* vén de transformador do mundo”, “o natural é o moitísimo que nos queremos”… E todas elas levan unha lenda común: “respecta, defende, sensibiliza, iguala, vive e deixa vivir”.

 “Sorrisos transformadores”, busca facer de Pontevedra unha provincia que respecta e defende todas as persoas, especialmente aquelas que son discriminadas inxustamente, e que lembre que calquera tipo de violencia sobre este colectivo supón unha vulneración atroz dos dereitos humanos. A exposición percorrerá vinte vilas da provincia despois do seu paso polo Pazo Provincial da Deputación en Pontevedra.