O Concello de Salceda ven de dar o pistoletazo de saída da IX Edición da Mostra-Exposición da Camelia. 70 expositores chegados de toda a xeografía galega, do norte de Portugal e incluso de Asturias fan desta a segunda mostra máis importante de Galiza, sólo por detrás da Internacional. Os visitantes poderán contemplar milleiros de camelias ao longo dos 150 metros preparados para a exposición. A mostra celébrase no Auditorio Municipal de Salceda e no edificio da Casa do Concello, e inclúe unha ampla programación complementaria durante as xornadas do sábado e do domingo.

A organización do evento corre da man da Concellaría de Turismo que dirixe Loli castiñeira, arroupada en todo momento pola Asociación de Xubilados e Pensionistas de Salceda, así como pola Asociación de Mulleres Rurais. Resulta fundamental ademáis a colaboración de Frigolouro, empresa encargada de ofrecer o xantar aos expositores, con unha degustación na que non podían faltar os tradicionais callos.

A programación compleméntase co concertó do grupo DIESE o sábado na apertura da mostra, e a feira de artesanía e agrosostible que se celebrará o domingo no entorno da Praza de Abastos.

Este ano ademáis dase a coincidencia de que o domingo se celebrará en Salceda o tradicional enfrontamento de entroido entre os barrios de Castro Barreiro e A Feira, que tivera que ser aprazado polo mal tempo, polo que a previsión é que milleiros de persoas se acheguen a Salceda durante toda a fin de semana.
Loli Castiñeira, Concelleira de Turismo: “un ano máis Salceda convértese no punto de destino de centos de apaixoados do mundo da camelia. Agradecemos especialmente a colaboración do tecido asociativo que sempre nos bota unha man neste tipo de eventos”.